Ég er enginn Maradona

Argentínskir fótboltamenn geta vart sparkað bolta í Evrópu án þess að byrjað sé að bera þá saman við kónginn sjálfan, Diego Maradona. Þessu hefur Ezequiel Lavezzi, leikmaður Napoli, fengið að kynnast en hann er ekki ánægður með samanburðinn.

Þessi 22. ára leikmaður hefur farið frábærlega af stað með Napoli á tímabilinu, átti stórleik gegn Udinese og skoraði mark auk þess sem hann skoraði þrennu í leik gegn Pisa í ítölsku bikarkeppninni.

„Ég er strax kominn með nóg af því að vera borinn saman við Maradona. Að vera líkt við þennan frábæra leikmann er einfaldlega of stór biti fyrir mig að kyngja. Ég þarf að halda mér á jörðinni. Einbeiting mín fer algjörlega í að sýna mig og sanna hér hjá Napoli," sagði Lavezzi.