Þrír stuðningsmenn United stungnir í Róm

Þrír af stuðningsmönnum Manchester United voru stungnir í átökum fyrir leikinn við Roma í Meistaradeildinni í Róm í kvöld. BBC greinir frá þessu nú rétt í þessu. Síðast þegar liðin mættust enduðu 11 stuðningsmenn á sjúkrahúsi eftir átök.

Meiðsli fórnarlambanna þriggja eru ekki sögð alvarleg samkvæmt fyrstu fréttum en ítalska lögreglan hefur staðfest fréttina. Átökin áttu sér stað í miðbæ Rómar fyrir leikinn.

Öryggiskröfur fyrir leikinn voru hertar til muna í ljósi óláta sem áttu sér stað á leik liðanna í fjórðungsúrslitum keppninnar í apríl.  Sagt er að um 1200 stuðningsmenn enska liðsins hafi farið með liðinu til Rómar.