FH-ingar höfðu enga trú á mér

Auðun Helgason skrifaði í dag undir tveggja ára samning við knattspyrnudeild Fram. Auðun ætlar sér stóra hluti hjá Safamýrarliðinu næsta sumar. Hann harmar að FH-ingar skuli hafa misst trúna á sig.

"Við vorum viku að ganga frá þessu frá því þetta kom upp fyrst og þegar ljóst varð að Þorvaldur Örlygsson tæki við liðinu, settumst við þrír niður og ræddum málin. Eftir það kítlaði það mikið að koma hingað. Það voru önnur lið að freista mín líka en á endanum ákvað ég að taka þessa áskorun og koma hingað. Fram er stórveldi í íslenskri knattspyrnusögu og það er okkar að koma liðinu á beinu brautina á ný," sagði Auðun í samtali við Vísi.

Hann hefur mikla trú á þjálfaranum Þorvaldi Örlygssyni. "Ég hef mikla trú á Þorvaldi. Hann er metnaðargjarn og ákveðinn en raunsær. Hann vill búa til öfluga umgjörð hérna og það finnst mér skipta miklu máli í íslenskri knattspyrnu. Það er nokkuð sem mér fannst farið að láta á sjá í Hafnarfirði og ég veit hvað þarf til svo hægt sé að koma liði í fremstu röð."

Auðunn segist vera í fínu formi og tilbúinn í slaginn næsta sumar - þar sem hann ætlar að sína FH-ingum hverju þeir misstu þegar þeir ákváðu að láta hann fara. "Ég er í ágætu standi og ætla mér að ná aftur í mitt besta form. Ég skil ágætlega við Hafnfirðinga, en það eru þarna menn inn á milli hjá FH sem hafa enga trú á mér og það er það versta - en þjálfarinn þar ræður ferðinni og ég ber virðingu fyrir því og leitaði því annað," sagði Auðun.

En fá þá FH-ingar að sjá hverju þeir misstu af næsta sumar? "Já, við skulum vona það," sagði Auðun og brosti.

Auðun er mikill fengur

Þorvaldur Örlygsson þjálfari segir að Auðun komi til með að styrkja lið Fram mikið í baráttunni næsta sumar. "Auðun er mikill fengur fyrir okkur. Hann er flinkur spilari og svo kemur hann líka inn með gríðarlega mikla reynslu sem hann getur miðlað bæði til mín og leikmanna. Við þurfum að styrkja lið okkar frekar á næstunni af því við vorum auðvitað að missa tvo sterka menn," sagði Þorvaldur. Hann segir of snemmt að fara að setja sér takmörk fyrir næsta keppnistímabil.

"Það er nú bara að koma nóvember og því er full snemmt að hugsa um það. Mig langar fyrst og fremst að reyna að búa til skemmtilegt lið sem er samkeppnishæft við hvaða lið sem er í deildinni. Lið sem nær úrslitum," sagði Þorvaldur í samtali við Vísi í dag.