Jón Ólafsson vill grænt samfélag í Ölfusi.

Ákvæði í samningi Jóns Ólafssonar athafnamanns og sonar hans við sveitarfélagið Ölfus útilokar mengandi starfsemi í grennd við stóra vatnsverksmiðju sem á að rísa að Hlíðarenda í Ölfusi. Jón vill vinna í sátt við sveitarfélagið þar sem hann sér fyrir sér grænt samfélag. Fyrirtækið hefur samið um dreifingu við Anheuser Busch, sem er það stærsta á sínu sviði í Bandaríkjunum. Anheuser Busch mun jafnframt eignast fimmtung í fyrirtækinu.

Helsta vörumerki Anheuser-Busch er Budweiser bjórinn og velta Anheuser-Busch er jafnvirði ríflega eitt þúsund milljarða íslenskra króna sem er nálægt þjóðarframleiðslu Íslendinga. Verksmiðjan í Þorlákshöfn hefur nú tíu starfsmenn en sú starfsemi flytur að Hlíðarenda þar sem ný verksmiðja tekur til starfa innan árs. Framleiðslugeta þeirrar verksmiðju verður um 200 milljón lítrar og þar munu skapast tugir starfa. Jón Ólafsson segir að lindirnar í Ölfusinu geti hæglega annað allri eftirspurn eftir flöskuvatni í heiminum.

Skammt frá Hlíðarenda en nær Þorlákshöfn hafa menn séð fyrir sér áltæknigarð. Alcan og Norsk Hydro hafa einnig sýnt áhuga á að reisa álver í landi Þorlákshafnar. Fyrirtæki feðganna hefur aðgang að lindum sveitarfélagsins um ófyrirséðan tíma samkvæmt samningi. Þar er einnig ákvæði sem fyrirbyggir mengandi stóriðju í grennd við verksmiðjuna. Jón segist ekki geta svarað þeirri spurningu hvort álver á þessum slóðum trufli átöppunarverksmiðjuna en segist vilja grænt samfélag í Ölfusið. Vatnsútflutningurinn geti þar valdið miklu. Fjórtán hafa reynt að flytja út vatn frá Íslandi en aðeins tveir eru enn að. Hann segist þó vera óhræddur. Hann hafi byrjað með hreint borð fyrir þremur árum og núna sé staðan þessi. Það sé ótrúlegt hverju menn fái áorkað ef þeir fái að vera í friði fyrir pólitík.