Tyrkir vilja samvinnu í orkumálum

Ráðstefnan í Istanbúl stendur fram á laugardag en en hana sækja um 900 sérfræðingar og áhrifamenn frá 120 löndum. Fram kemur í tilkynningu frá forsetaembættinu að forsætisráðherra Tyrklands, Tayyip Erdogan, hafi sett ráðstefnuna í morgun en hann óskaði í framhaldinu eftir sérstökum fundi með forseta Íslands til að ræða möguleika á samvinnu við Íslendinga um nýtingu jarðhita, bæði á sviði rannsókna og framkvæmda. Tyrkland er meðal þeirra landa í veröldinni sem búa yfir miklum auðlindum á þessu sviði en þær hafa enn sem komið er lítt verið nýttar.

Erdogan forsætisráðherra vísaði til þess mikla árangurs sem Íslendingar hafa náð á þessu sviði, tæknilegrar forystu og reynslu af verkefnum víða um heim. Hann lýsti yfir miklum áhuga á því að senda sendinefnd til Íslands að loknum þingkosningum í Tyrklandi til viðræðna við orkufyrirtæki, sérfræðistofnanir og fjármálafyrirtæki.

Forseti Íslands átti einnig í gær fund með forseta Tyrklands Ahmed Necdet Sezer. Á þeim fundi kom fram ríkur áhugi forseta Tyrklands á að Tyrkir kynntu sér ítarlega árangur Íslendinga á sviði hreinnar orku, bæði á sviði vatnsafls og jarðhita. Nýting hreinnar orku gæti orðið grundvöllur nýrrar samvinnu milli landanna.

Þá ræddu forsetarnir einnig um samstarfsverkefni í forvörnum gegn fíkniefnum, en Istanbul tekur ásamt 14 öðrum evrópskum borgum þátt í verkefninu Ungmenni í Evrópu: Gegn fíkniefnum. Forseti Íslands er verndari verkefnisins en það er byggt á reynslu Reykjavíkurborgar og rannsóknum félagsvísindamanna við Háskóla Íslands og Háskólann í Reykjavík.

Á meðan á dvölinni í Istanbúl stendur mun forseti Íslands jafnframt eiga fund með Kadir Topbas, borgarstjóra Istanbúl, um verkefnið og baráttuna gegn fíkniefnum. Forseti Íslands átti einnig fund með Georgi Parvanov, forseta Búlgaríu, en hann tók þátt í leiðtogafundi Svartahafsráðsins sem haldinn var í Istanbúl í vikunni. Forsetarnir ræddu um árangur af auknum umsvifum íslenskra fyrirtækja í Búlgaríu.