Hatton vill bara stóra andstæðinga framvegis

Breski hnefaleikarinn Ricky Hatton segist aðeins vilja berjast við "stóra" andstæðinga framvegis á ferli sínum, en hann mætir einum slíkum í Jose Luis Castillo í Las Vegas aðfararnótt sunnudagsins. Bardaginn verður sýndur beint á Sýn.

"Ef ég hefði kært mig um það, hefði ég geta verið áfram í gamla þyngdarflokknum mínum og varið titilinn 30 sinnum. Ég vil hinsvegar berjast við þá bestu. Ég á aðeins tvö eða þrjú ár eftir af ferlinum og á þeim tíma vil ég bara berjast við úrvalsmenn. Ég barðist við Kostya Tszyu og nú berst ég við Castillo - það er frábært. Það þýðir ekkert að horfa til baka og skoða fyrstu andstæðingana mína til að meta ferilinn minn, því framvegis verða þetta bara alvöru andstæðingar," sagði Hatton, en Castillo hefur vakið máls á því á blaðamannafundum fyrir bardagann að hann sjálfur hafi barist við - og sigrað - stærri andstæðinga en Hatton á ferlinum til þessa.