Neytendasamtökin ósátt við innflutningsbann á kjöti og ostum

Neytendasamtökin eru ósátt við bann við innflutningi á hráu kjöti og ostum úr ógerilsneyddri mjólk og óska þau eftir rökstuðningi frá ráðherra fyrir banninu. Samtökin segja að íslenskar reglur í þessum málum séu þær ströngustu sem þekkist á byggðu bóli, að Noregi meðtöldu.

Þetta kemur fram á heimasíðu samtakanna í dag. „Þeir ferðalangar sem freistast til að taka með sér hráskinku, spægipylsu eða gómsæta osta þegar þeir snúa heim úr fríinu eiga það á hættu að vera gripnir glóðvolgir í tollinum," segir á heimasíðunni. „Það er bannað að flytja hrátt kjöt og osta úr ógerilsneyddri mjólk inn til landsins nema með tilskyldu leyfi. Raunar ber að taka fram að ekki er hægt að mæla með neyslu á ostum úr ógerilsneyddri mjólk vegna þess að of oft hafa þar fundist óæskilegar örverur." Samtökin benda hins vegar á að á mörgum ostum sem framleiddir séu úr gerilsneyddri mjólk komi það ekki sérstaklega fram á umbúðunum „og því eru þeir fjarlægðir af tollinum ef slíkir finnast."

Þá segir Neytendasamtökunum sé ekki kunnugt um að nokkurt annað land í Evrópu hafi svo strangar reglur, „ekki einu sinni Noregur sem er þó líkt og Ísland fremst í flokki þegar kemur að verndartollum og höftum á innflutningi á landbúnaðarafurðum."

Samtökin segja að rökin fyrir banninu, að matvælin auki hættu á búfjársjúkdómum, séu mjög langsótt og óska þau eftir gildum rökstuðningi frá landbúnaðarráðherra vegna þessa. „Það verður að teljast harla ólíklegt að íslensku búfé stafi hætta af því þótt fólk narti í erlenda hráskinku og osta heima hjá sér," segir í fréttinni. „Það er ekki ásættanlegt að íslenskir neytendur gerist lögbrjótar ef þeir taka með sér matvæli sem seld eru á evrópska efnahagssvæðinu og eru talin örugg þar. Íslenskir neytendur eiga betur skilið."