Hátt í þrjú þúsund ungmenni til starfa hjá Vinnuskólanum

Gert er ráð fyrir að um 2.500 ungmenni muni starfa hjá Vinnuskóla Reykjavíkur í sumar. Skráningum lýkur í næstu viku og segir skólastjóri Vinnuskólans að hægt verði að útvega öllum þeim vinnu sem vilja.

„Það er nóg af verðugum og skemmtilegum verkefnum sem bíða okkar í sumar," sagði Guðrún Þórsdóttir, skólastjóri Vinnuskóla Reykjavíkur, í samtali við Vísi. „Það verður auðvelt útvega öllum vinnu sem vilja."

Vinnuskólinn býður ungmennum á aldrinum 14 til 16 ára upp á sumarvinnu. Skólinn hefst 11. júní næstkomandi og gerir Guðrún ráð fyrir því að fjöldi nemenda verði svipaður og í fyrra eða um 2.500 manns.

Sumarstarf skólans stendur til 3. ágúst næstkomandi en elstu nemendurnir fá tækifæri til að vinna til 10. ágúst ef þeir óska þess sérstaklega.