Velferð barna og kvenna einna mest hér á landi

Ísland er í öðru sæti á lista Barnaheilla, Save the Children, yfir þau lönd þar sem velferð kvenna og barna er mest í heiminum. Í árlegri skýrslu samtakanna er birtur listi yfir þau lönd þar sem konur og börn hafa það best og skipa Svíar, Íslendingar og Norðmenn efstu þrjú sætin.

Þar á eftir koma Nýja-Sjáland og Austurríki en Danmörk og Finnland eru í 6. og 7. sæti. Konur og börn hafa það hins vegar verst í Afríkuríkinu Níger og af þeim tíu löndum þar sem staðan er hvað verst eru níu þeirra sunnan Sahara-eyðimerkurinnar í Afríku. Fram kemur í skýrslu Barnaheilla að í þessum löndum deyr ein af hverjum þrettán mæðrum af barnsförum og nærri fimmta hvert barn nær ekki fimm ára aldri.

Þá er bent á það í skýrslunni að dæmigerð sænsk kona sæki skóla í 17 ár og lifi til 83 ára aldurs og að eitt af hverjum 150 sænskum börnum nái ekki fimm ára aldri. Í Níger fá konur að meðaltali þriggja ára menntun og ná aðeins 45 ára aldri og þá deyr fjórða hvert barn í landinu. Þetta þýðir að hver móðir missi tvö börn á lífsleiðinni í Níger.

Þá er enn fremur bent á að tíu milljónir barna deyi árlega í heiminum fyrir fimm ára aldur úr kvillum sem auðvelt sé að koma í veg fyrir eða lækna. Flest þeirra eru í þróunarríkjunum. Sagt er i skýrslunni að lítil framför hafi orðið í baráttunni við barnadauða í 20 þróunarríkjum á síðustu fimmtán árum og af því hafa samtökin Barnaheill áhyggjur. Í þessum hópi eru börn í Írak, Botsvana og Simbabve og Svasílandi. Þá er bent á að barnadauði sé hvað mestur í þeim löndum þar sem átök hafi geisað undanfarin ár eins og í Afganistan, Líberíu og Síerrra Leóne.

Enn fremur er bent á að af þeim tíu milljónum barna sem deyi árlega megi bjarga sex milljónum með því að nota þá þekkingu og tækni sem fyrir hendi sé í heiminum og sé ekki kostnaðarsöm. Hins vegar sé þessu ekki að dreifa í löndunum og því þurfi að breyta.