Sýknaður af ákæru um ærumeiðingar á Vísi

Karlmaður var í Héraðsdómi Suðurlands í dag sýknaður af ákæru um ærumeiðingar í garð Hans Markúsar Hafsteinssonar, fyrrverandi sóknarprests í Garðasókn, á umræðuvef Vísis í júlí 2005.

Töluverðar deilur voru þá innan Garðasóknar og lét einhver sem skráði sig undir netfanginu draumaprins@visir.is þau orð falla á umræðuvefnum að Hans Markús hefði meðal annars svindlað sér í gegnum guðfræðina og sakaði hann um að vera á geði.

Hans Markús kærði þessi ummæli til lögreglu sem rakti netfangið til hins ákærða. Hann viðurkenndi að vera skráður fyrir netfanginu en neitaði því hins vegar að hafa skrifað hin niðrandi orð á vefinn. Sagðist hann hafa miðlað til netfanginu og aðgangsorði þess til fjölmargra manna, meðal annars nemenda sinna.

Við rannsókn málsins var hins vegar ekki leitað eftir svokallaðri IP-tölu, sem gefur til kynna í hvaða tölvu umrædd ummæli hafa verið skrifuð, fyrr en mörgum mánuðum eftir að kæran var lögð fram en þá reyndist ekki hægt að rekja hana.

Var því ekki hægt að útiloka að einhver annar hefði skrifað umrædda færslu og var maðurinn því sýknaður af ákæru um ærumeiðingar.