Færeysk þjóðhetja teflir til vinnings í Reykjavík

Viktor Nitander frá Svíþjóð er efstur í A-flokki á Norðurlandamótinu í skólaskák sem fram fer í Reykjavík, með þrjá og hálfan vinning eftir fjórar skákir. Dagur Arngrímsson frá Íslandi og Helgi Dam Ziska frá Færeyjum eru báðir í öðru sæti með þrjá vinninga.

Sextíu ungmenni frá öllum Norðurlöndunumá aldrinum níu til nítján ára reyna með sér á skákborðinu á Norræna skólaskákmótinu í Reykjavík nú um helgina. Það er óhætt að segja að sá skákmaður sem stelur hvað mest senunni sé Helgi Dam Ziska, fimmtán ára alþjóðlegur meistari frá Færeyjum. Hann er hálfgerð þjóðhetja í heimalandinu og var nú fyrir skömmu kosinn íþróttamður ársins í Færeyjum. Enda er hann aðeins annar Færeyingurinn til að ná því að verða alþjóðlegur meistari í skák.

Helgi Dam þakkar árangur sinn að hluta að hafa átt þess kost að tefla mikið á Íslandi, þar sem hann hefur náð að tefla við stigaháa mótherja, sem hefur síðan gefið honum sjálfum ELO stig. Í A-flokki teflir fólk á aldrinum 17 til 19 ára og því þurfti Helgi Dam að fá undanþágu til að keppa í þeim flokki.

Í gær gerði hann jafntefli við Íslendinginn Dag Arngrímsson og deila þeir saman öðru sætinu í A-flokki. Norðurlandameistarinn frá í fyrra, Hjörvar Steinn Grétarsson er efstur í C-flokki með þrjá vinninga. Sænska skáksveitin er efst á mótinu með samanlagt 27 og hálfan vinning, þá koma Norðmenn, Danir og Íslendingar, en færeyska sveitin er í sjötta sæti. Fimmta og næst síðasta umferð mótsins hófst klukkan níu í morgun og lokaumferðin hefst svo klukkan þrjú í dag.