Bænum ber að stöðva framkvæmdir í Álafosskvos

Mosfellsbæ ber að stöðva framkvæmdir sem hafnar eru við lagningu Helgafellsbrautar. Úrskurðarnefnd skipulags- og byggingarmála kvað í gær upp bráðabirgðaúrskurð þessa efnis og hefur nefndin nú frest til loka aprílmánaðar til að úrskurða um lögmæti framkvæmdanna.

Bæjarstjórn Mosfellsbæjar samþykkti í desember síðastliðnum deiliskipulag sem tók til yfir fimm hundruð metra kafla tengibrautar milli Helgafellslands og Álfafossvegar. Jafnframt var samþykkt að gefa út framkvæmdaleyfi fyrir gerð tengibrautarinnar.

Nokkrar deilur hafa staðið um lagningu brautarinnar. Samþykkt Mosfellsbæjar um deiliskipulagið og framkvæmdaleyfið var kærð til úrskurðarnefndar skiplags- og byggingarmála í lok janúar af nítján íbúum og eigendum fasteigna við Brekkuland og Álafossveg. Hópurinn telur að ekki hafi verið gerð grein fyrir áhrifum framkvæmdarinnar á umhverfi og náttúruauðlindir á svæðinu.

Úrskurðarnefndin kvað í gær upp bráðabirgðaúrskurð í málinu. Nefndin taldi að skoða þyrfti ákveðin atriði betur og ákvað að stöðva framkvæmdir á meðan það yrði gert. Meðal annars er horft til nýrra laga um umhverfismat áætlana og spurningar eru um hvort taka hefði átt mið af þeim.

Nefndin hefur nú fram til loka apríl mánaðar til að komast að endanlegri niðurstöðu í málinu.

Stefán Ómar Jónsson, bæjarritari í Mosfellsbæ, sagði í samtali við fréttastofu í morgun að bærinn hafi beint því til framkvæmdaaðila að stöðva framkvæmdirnar. Úrskurðurinn hafi borist bænum í morgun og verið sé að fara yfir hann en að öðru leyti vildi hann ekki tjá sig um málið.