Margrét gengur úr Frjálslynda flokknum

Margrét Sverrisdóttir ætlar að segja sig úr Frjálslynda flokknum. Í yfirlýsingu sem hún sendi út frá sér í kvöld, eftir fund með stuðningsmönnum sínum, segist hún þó ekki hætt í pólitík. Hún skilar inn formlegri úrsögn úr flokknum á morgun.

Í yfirlýsingunni segir Margrét að þingmenn Frjálslynda flokksins og fulltrúar stjórnmálasamtakanna Nýs afls hafi unnið markvisst að því að bola henni úr forystu Frjálslynda flokksins. Í ljósi vinnubragða sem hafi verið viðhöfð á landsþingi flokksins um helgina telji hún sér ekki fært að starfa lengur innan vébanda flokksins. Flokkurinn hafi yfirgefið hana en þrátt fyrir það sé hún ekki hætt í pólitík. Hún segir ekki rétt að hún hafi leitað á önnur mið enda ætli hún ekki að aðhafast neitt nema í nánu samráði við samherja sína.

Stuðningsmenn Margrétar sendu einnig frá sér yfirlýsingu í kvöld vegna málsins. Þar segja þeir áherslur og vinnubrögð innan flokksins hafa breyst með komu Nýs afls. Þeir séu hins vegar áfram fylgjandi þeim grundvallarhugsjónum sem flokkurinn byggði áður á og ætli að finna þeim nýjan farveg. Þeir vænti þess að njóta krafta Margrétar á nýjum vettvangi.