Buffon íhugar að fara frá Juventus

Ítalski landsliðsmarkvörðurinn Gianluigi Buffon hefur viðurkennt að hann gæti farið frá Juventus áður en leiktíðinni í B-deildinni lýkur af því gefnu að liðið verði í toppsætinu þegar að því kemur.

"Ég ætla að bíða í tvo eða þrjá mánuði og sjá hvernig staðan verður á liðinu í deildinni. Juventus verður áfram stórlið hvort sem ég verð hérna eða ekki, en ég væri til í að vita hvort við verðum með lið sem er líklegt til afreka eða ekki. Það væri í raun réttast af mér að fara frá félaginu ef ég er ekki tilbúinn til að binda framtíð mína hérna og þá koma félög erlendis alveg eins til greina, því á Ítalíu er erfitt að spila fyrir erkifjendur liðsins - enda hafa lið eins og Inter og AC Milan þegar góða markverði," sagði Buffon.