Del Piero markahæstur

Alessandro del Piero var í skýjunum yfir þrennunni sem hann skoraði fyrir Juventus í 5-0 sigrinum á Crotone í dag. Þrennan gerir það að verkum að þessi skemmtilegi leikmaður er orðinn markahæstur í B-deildinni með 12 mörk.

"Það var frábært að skora þrennu en það sem mikilvægast er er að við erum að vinna leiki. Okkur gengur jafnan vel á heimavelli, en það eru útileikirnir sem hafa verið okkur erfiðir í vetur. Nú er bara að halda áfram á sömu braut," sagði Del Piero. Juventus hefur þriggja stiga forystu á toppi B-deildarinnar en Napoli getur náð liðinu að stigum með sigri í sínum leik á morgun.