Greiða 67 milljónir árlega með Perlunni

Reykjavík Orkuveita Reykjavíkur (OR), sem er í meirihlutaeigu borgarinnar, greiddi tæplega 67 milljónir með Perlunni árið 2005. Heildarkostnaður vegna hennar það árið nam rúmum áttatíu milljónum, en tekjurnar voru fjórtán milljónir. Stærsti kostnaðarliðurinn er fasteignagjöld, en OR greiddi rétt um 45 milljónir í þau á umræddu ári.

Að sögn Hjörleifs Kvaran, aðstoðarforstjóra OR, er þessi kostnaður hefðbundinn milli ára. Auk rekstrarkostnaðar rýrnar verðmæti Perlunnar um sextíu milljónir á ári.

Perlan kostaði vel á þriðja milljarð króna á núvirði í byggingu. Hún var tekin í notkun árið 1991. Því má ætla að rekstrartap vegna hennar frá þeim tíma nemi rúmlega milljarði króna auk fyrningar á verðmæti hennar, sem er svipuð upphæð.

Guðlaugur Þór Þórðarson, stjórnarformaður OR, segir upphaflegan tilgang byggingarinnar hafa verið að koma upp tákni fyrir borgina. „Reykjavíkurborg yrði ekki söm án Perlunnar og mér finnst mikil prýði af henni. Það er náttúrlega æskilegt og í sjálfu sér alltaf markmið að lækka kostnað vegna hennar og ná fram meiri hagræðingu í rekstrinum. Margar tillögur hafa komið fram um það en flestar hafa verið þess eðlis að það hefur verið erfitt að fara út í þær.“

Hann segir fasteignagjöldin vissulega vera há en taka verði tillit til þess að þau greiðist til eiganda OR, Reykjavíkurborgar. Því sé raunverulega verið að færa fé vasa á milli.

Að sögn Guðlaugs yrði það afskaplega flókið mál að selja Perluna jafnvel þótt vilji væri fyrir því. „Við seljum til að mynda ekki hitaveitutankanna. Það held ég að væri afar óskynsamlegt því við þurfum á þeim að halda. Þeir eru allir í fullri notkun hjá Orkuveitunni fyrir utan þennan eina sem er notaður sem safn.“

Dagur B. Eggertsson, borgarfulltrúi Samfylkingarinnar, segir það ekki þjóna neinum tilgangi að velta sér upp úr réttmæti þess að ráðast í byggingu Perlunnar. „Það var gert og hún er þarna. En það er auðvitað slæmt að borgin sé að greiða þessar fjárhæðir með henni árlega. Ég held að það sé hægt að nýta hana mun betur en til að hýsa útsölumarkaði líkt og nú er gert.“