Engin niðurstaða komin í auðlindamálið

Formenn og varaformenn stjórnarflokkanna hittust á fundi í forsætisráðuneytinu í morgun til að ræða nýtt stjórnarskrárákvæði um auðlindir, sem stjórnarsáttmálinn gerir kröfu um. Engin niðurstaða er enn kominn í málið en ráðherrarnir gerðu lítið úr ágreiningi sínum. Framsóknarmenn hafa lagt ofurkapp á málið en það var ekki rætt í stjórnarskrárnefnd sem lauk störfum í febrúar.

Árni M. Mathiesen fjármálaráðherra sagði í hádegisviðtali Stöðvar 2 að það væri "alveg á mörkunum" að niðurstaða fengist í málinu fyrir kosningar. "Ef að líkum lætur þá leysum við þetta eins og annað í ríkisstjórninni. Það þarf að vanda þetta sérstaklega. Það er erfiðara að breyta stjórnarskránni en venjulegum lagaákvæðum og þess vegna þurfa menn að vanda sig betur," sagði Árni

Jón Sigurðsson og Guðni Ágústsson lögðu mikla áherslu á að um reglubundinn fund hefði verið að ræða milli forystumanna stjórnarflokkanna.

Jón var spurður að því hvort málið væri eldfimt. „Ég geri ekki ráð fyrir því. Þetta eru sameiginleg viðfangsefni sem við erum að vinna,"sagði Jón eftir fundinn.

Guðni Ágústsson var spurður út í stór orð sem Siv Friðleifsdóttir lét falla um hugsanleg stjórnarslit vegna málsins fyrir helgi. Hann sagði: „Við förum bara yfir þetta í mikilli ró og friðsemd og það var niðurstaða þessa fundar."

Hann var þá spurður hvort Framsóknarflokkurinn hefði lagt niður skottið í málinu. „Við höfum ekki lagt niður neitt einasta skott. Við höfum ekki verið með neinar þær hótanir. Við höfum bara talið þetta vera mikilvægt ákvæði í stjórnarsáttmálanum," sagði Guðni og bætti við að hann teldi að búið væri að oftúlka orð Sivjar.

Guðni vildi ekki svara því hvort núna kæmi til greina að halda áfram stjórnarsamstarfinu þrátt fyrir að þetta ákvæði færi ekki inn í stjórnarskrá.

Forsætisráðherra segir fundinn hafa farið vel fram og mörg mál hafi verið til umræðu. „Það er ekkert sérstakt dramatískt í uppsiglingu ef einhver heldur það," sagði Geir.

Hann var þá spurður hvað honum fyndist um þá dramatík sem verið hefði í yfirlýsingum framsóknarmanna fyrir helgi. „ Ég ætla ekkert að tjá mig um það sem einstakir aðilar hafa verið að segja. Það er verkefni formanna flokkanna að leysa málið og við vorum hér á fundi í morgun með varaformönnunum til þess," sagði Geir. Hann sagði stjórnarsamstarfið ekki í neinni hættu.

Spurður hvort búið væri að leysa málið sagði Geir: „Við erum að leysa mörg mál samtímis. Það er ekki komin alveg niðurstaða varðandi þetta atriði sem þú ert að vísa til en við höldum því bara áfram."

Þorgerður Katrín Gunnarsdóttir menntamálaráðherra sagðist ekki taka undir með Sigurði Kára Kristjánssyni, þingmanni Sjálfstæðisflokksins, sem sagði að heilbrigðisráðherra ætti að segja af sér vegna yfirlýsinga sinna fyrir helgi. „Menn hafa bara sínar skoðanir og er frjálst að tjá þær. Eins og forsætisráðherra var að segja eru menn að vinna að þessu og það er góð sátt milli stjórnarflokkanna," sagði Þorgerður Katrín.