Logi lofar sókndjarfara liði

Logi Ólafsson nýráðinn þjálfari KR segir að búast megi við sókndjarfara liði frá stjórnartíð forvera síns. Fyrsta verkefni Loga með KR liðið verður í Evrópukeppni félagsliða á KR velli í kvöld.

KR-ingar taka á móti sænska liðinu Häcken í kvöld en þetta er síðari leikur liðanna í fyrstu umferð Evrópukeppninnar. Liðin gerðu 1-1 jafntefli í fyrri viðureign liðanna í Gautaborg fyrir hálfum mánuði. Svíarnir komust í 1-0 eftir 10 mínútna leik, en Guðmundur Pétursson jafnaði metin fyrir KR á 68. mínútu og ættu KR -ingar því að teljast í ágætis málum fyrir leikinn í dag.

Logi Ólafsson sem tók við stjórn KR liðsins á mánudag hefur haft skamman tíma til að undirbúa lið sitt fyrir leikinn. Logi sagði í samtali við fréttastofu Stöðvar 2 og Vísis í morgun að helstu áherslubreytingar verði að leikmenn séu ákveðnir í að fara í leikinn í dag með meiri gleði en minni áhyggjum. Hann segir sjálfstraustið í liðinu eðlilega vera lágt eftir gengið í Landsbankadeildinni í sumar og verði nú unnið í hugarfarsbreytingu.

Logi reiknar ekki með miklum mannabreytingum á liðinu en þó megi búast við að liðið færi sig framar á völlinn en í undanförnum leikjum. Mikil áhersla verði þó lögð á öflugan varnarleik og reynt verið að gera sóknirnar markvissari.

Häcken vermir sjötta sæti annarrar deildar í Svíþjóð og öðlaðist þátttökurétt í Evrópukeppninni á háttvísisverðlaunum. Liðið hefur unnið síðustu tvo leiki sína í deildinni og er fjórum stigum frá þriðja sætinu sem veitir sæti í úrvalsdeild. Leikur KR og Hacken hefst 18:45 á KR velli í kvöld.