Lögreglan þurfti að brjóta sér leið inn í bíl

Lögreglan handtók tvennt í nótt sem leið eftir æsilegan eltingaleik um Breiðholtshverfið. Klukkan fimmtán mínútur í tvö gáfu lögreglumenn bifreið í efra Breiðholti stöðvunarmerki. Bílstjórinn sinnti því í engu og upphófst þá snörp eftirför sem lauk ekki fyrr en bílstjórinn hafði komið sér í sjálfheldu í Hólahverfi.

Þegar lögregla skipaði fólkinu út úr bílnum neituðu ökumaður, kona á þrítugsaldri og farþeginn, karl á fertugsaldri, að koma út. Lögreglan neyddist að lokum til þess að brjóta sér leið inn í bílinn. Ökumaðurinn er grunaður um akstur undir áhrifum og í bílnum fundust ætluð fíkniefni. Síðar kom í ljós að bílnum hafði verið stolið af bílasölu síðdegis í gær. Fólkið er nú vistað í fangageymslum og bíður yfirheyrslu.