Öryggismyndavélar veita ekki alltaf öryggi

Öryggismyndavélar eru víða um borgina og telja sjálfsagt flestir að vélarnar veiti þeim öryggi. Það er þó ekki alltaf svo.

Kristín Ása Einarsdóttir skrapp fyrir skömmu um kvöldmatarleytið í göngutúr í Elliðaárdalnum til að viðra hundinn. Bílnum lagði hún á bílastæðið fyrir utan Árbæjarlaug. Þegar hún sneri aftur, 20 mínútum síðar, brá henni í brún. Þá búið að brjótast inn í bílinn og taka handtöskuna hennar.

Það væri svo sem ekki í frásögur færandi, bíræfnir þjófar eru reglulega á ferð um borgina, nema Kristín Ása sá sér til mikillar ánægju að bíllinn stóð í beinni sjónlínu við öryggismyndavél utan á Árbæjarlaug. Kristín segist hafa kannað það hvort myndir hefðu náðst af ræningjunum en fengið þau svör að slökkt væri á myndavélunum.

Þegar Stöð 2 leitaði svara við því hvers vegna slökkt er á vélunum sagði Jens Á. Jónsson, forstöðumaður Árbæjarlaugar, að rekstraraðilum bæri ekki að vakta bílastæðið. Það hefði þó verið gert á upphafsárum laugarinnar en þegar á reyndi voru myndir úr vélunum ekki nógu skýrar. Menn sáust einfaldlega ekki nógu vel á myndunum. Í framhaldi af því hefði verið ákveðið að endurnýja ekki búnaðinn þegar hann bilaði.

Hjá ÍTR fengust þær upplýsingar að öryggismyndavélar væru hvergi annars staðar á útisvæðum eða bílastæðum hjá mannvirkjum ÍTR - hvorki virkar né óvirkar. Sem fyrr er því besta vörnin - að skilja engin lokkandi verðmæti eftir í bílnum.