Þetta er mikil áskorun

FH gekk frá samningum við tvo sterka leikmenn í gær; varnarmanninn Höskuld Eiríksson frá Víkingi, eins og getið er um ofar á síðunni, og svo við framherjann Jónas Grana Garðarsson sem var markakóngur Landsbankadeildarinnar í sumar.

Aðeins eru tvö ár síðan Húsvíkingurinn fór frá FH þar sem hann fékk afar fá tækifæri með liðinu. Mikið fjaðrafok var í kringum félagaskipti Jónasar enda stóð FH í vegi fyrir því að hann fengi að spila með öðru liði í Landsbankadeildinni. Til að losna frá FH varð Jónas því að semja við lið í 1. deildinni. Úr varð að hann gekk í raðir Fram. Hann minnti FH síðan rækilega á hverju félagið var að missa af er hann skoraði tvö mörk gegn FH í Krikanum.

„Ég er kominn heim. Nýr þjálfari er aðalástæðan fyrir því að ég er kominn í FH og að mér bauðst að koma í FH. Ég óttast ekki að þurfa að sitja á bekknum. Annars hefði ég ekki farið að semja við FH og ég geri ekki ráð fyrir því að Heimir sé að fá mig á sömu forsendum og voru áður. Það er samt enginn áskrifandi að sæti í FH-liðinu," sagði Jónas Grani, 34 ára, sem hefur mikla trú á Heimi Guðjónssyni sem þjálfara en hann gerir eins árs samning við FH.

„Það var samt vissulega erfitt að yfirgefa Fram enda átti ég góðan tíma þar og mér gekk vel í bláu treyjunni."

Eins og áður segir var talsvert fjaðrafok í kringum brotthvarf Jónasar Grana á sínum tíma og sitt sýndist hverjum um aðferðir stjórnar FH í málinu. Sjálfur var Jónas ekki sáttur.

„Vissulega var ég ekki sáttur enda taldi ég mig hafa skilað mínu til félagsins og eiga betra skilið. Staðreyndin er samt sú að FH er mun stærra og meira en nokkrir einstaklingar sem vildu ekki leyfa mér að fara í úrvalsdeildarlið á sínum tíma," sagði Jónas Grani, sem er löngu hættur að velta sér upp úr fortíðinni og hlakkar til næsta sumars.

„Þetta er mikil áskorun fyrir mig og ég vildi taka henni. Óli taldi sig ekki hafa not fyrir mig á sínum tíma og menn geta deilt um þá ákvörðun. Árangur hans talar aftur á móti sínu máli og því ætla ég ekkert að rífast um það. Ég tel mig samt hafa sýnt hjá Fram að ég hef ýmislegt fram að færa í fótbolta. Vonandi sýni ég það áfram næsta sumar." henry@frettabladid.is