Hef alltaf sagt að ég kunni ekki að skalla

Jónas Grani Garðarsson, leikmaður Fram, skoraði bæði mörk liðs síns gegn Breiðabliki í 2-2 jafntefli liðanna í lokaumferð Landsbankadeildar karla í gær og varð því markakóngur Landsbankadeildar með 13 mörk í 17 leikjum.

„Það er ekki annað hægt en að vera sáttur núna. Þetta hafðist með herkjum hjá okkur en auðvitað hefðum við viljað gera betur í sumar og við vitum upp á okkur skömmina með það," sagði Jónas en sagði engu að síður að markmiðinu hefði verið náð.

„Fólk gleymir því stundum að við vorum nýliðar í deildinni í ár og með nýtt lið, þannig að markmiðið var auðvitað til að byrja með að halda sætinu í deildinni og það tókst að lokum. Við vorum komnir með bakið upp við vegg en við náðum að snúa við blaðinu og getum byggt ofan á það í framhaldinu," sagði Jónas sem segist líklega aldrei hafa verið í betra formi.

„Ég hef náttúrulega aldrei verið að spila svona mikið þannig að formið er fínt og það er auðvitað grundvallaratriði að vera vinnusamur á vellinum ef maður ætlar að skora mörk og það hefur gengið vel í sumar. Ég er líka ánægður með að fá að spila í sókninni, þar sem ég er miðjumaður að upplagi og yfirleitt eru þeir nú færðir aftar á völlinn með aldrinum," sagði Jónas Grani í léttum dúr.

Jónas Grani skoraði sex af mörkum sínum í sumar með því að skalla boltann í markið en kvaðst samt ekki vera neinn sérfræðingur á því sviði. „Ég verð nú seint talinn til góðra skallamanna og ég hef í raun alltaf sagt að ég kunni ekki að skalla boltann. Ætli það sé ekki bara málið, að gera bara eitthvað og vona svo það besta," sagði Jónas að lokum.

Jónas Grani tók gullskóinn af Valsmanninum Helga Sigurðssyni í lokaumferðinni. „Ég hefði aldrei viljað skipta á gullskónum og Íslandsmeistaratitlinum. Grani stóð sig frábærlega og hélt Fram á floti. Ég er mjög sáttur við tímabilið hjá mér og hjá liðinu. Ég gæti ekki verið ánægðari," sagði Helgi eftir sinn leik.