Þróun í útrás

Þúsaldarmarkmið Sameinuðu þjóðanna eru metnaðarfyllstu markmið sem alþjóðasamfélagið hefur sett sér frá stofnun S.þ. Alls eru þúsaldarmarkmiðin átta og leggur hið áttunda í röðinni áherslu á að styrkja hnattræna samvinnu um þróun. Í þessu felst ekki aðeins að auka beri opinber framlög til þróunarsamvinnu, stuðla að lækkun erlendra skulda þróunarríkjanna og bæta aðgang þróunarlandanna að mörkuðum í iðnríkjunum, heldur einnig viðurkenning á því mikilvæga hlutverki sem einkageirinn getur leikið við að skapa almenningi í fátækari ríkjum heims betri lífskjör.

Fyrir skemmstu skrifaði ég undir samstarfssamning utanríkisráðuneytisins og Þróunaráætlunar Sameinuðu þjóðanna um að efla samstarf hins opinbera og einkageirans í þróunarlöndum. Í samningnum felst að á næstu þremur árum verða sett saman fimm tilraunaverkefni í samstarfi við íslensk fyrirtæki, stofnanir og samtök sem miða að uppbyggingu á raunhæfu samstarfi opinberra aðila og einkageirans í þróunarríkjum. Utanríkisráðuneytið mun verja um 10 milljónum króna til verkefnisins.

Af þessu tilefni hélt utanríkisráðuneytið og Þróunaráætlun S.þ. morgunverðarfund þar sem Bjarni Ármannsson, forstjóri Glitnis, hélt m.a. ávarp. Í máli Bjarna kom glögglega fram að Glitnir hefur með skýrum hætti skilgreint samfélagslega ábyrgð sína og sett sér ákveðin markmið um hvernig fyrirtækið ætlar sér að standa undir þeirri ábyrgð.

Það er sannfæring mín að öflug alþjóðleg fyrirtæki sem axla samfélagslega ábyrgð sína af heilum hug geti skipt sköpum fyrir efnahagsþróun í fátækari ríkjum heims. Þess vegna tel ég mjög brýnt að auka samstarf hins opinbera og einkageirans enn frekar þegar kemur að þátttöku Íslands í þróunarsamvinnu.

Undirritun samstarfssamningsins við Þróunaráætlun S.þ. er meðal fyrstu skrefanna í þessa átt. En ég tel að við eigum að taka fleiri og stærri skref. Eitt slíkt skref gæti verið stofnun sérstaks fjárfestingarsjóðs sem komið gæti að útrás íslenskra fyrirtækja til þróunarríkja og uppbyggingu viðskipta við þróunarlönd. Fyrirmyndir af slíkum sjóðum má finna víða í nágrannalöndum.

Leiðin að þúsaldarmarkmiðum Sameinuðu þjóðanan kann að virðast löng og torsótt. En með hverju því skrefi sem við stígum af þessu tagi færumst við nær þessum brýnustu markmiðum alþjóðasamfélagsins.

Höfundur er utanríkisráðherra.