Reinfeldt forsætisráðherra, Bildt utanríkisráðherra

Fredrik Reinfeldt, nýr forsætisráðherra Svíþjóðar, kynnti ríkisstjórn sína í morgun. Athygli vekur að Carl Bildt, fyrrverandi forsætisráðherra verður utanríkisráðherra. Í ræðu á sænska þinginu sagði Reinfeldt að staðið yrði við gefin loforð um skattalækkanir og breytingar á velferðarkerfinu.

Skipan Reinfeldts var samþykkt með 174 atkvæðum gegn 169. Reinfeldt er 41 árs og yngsti forsætisráðherra Svía í 80 ár. Bandalag mið og hægriflokka undir forystu hans van stórsigur í þingkosningum í síðasta mánuði. Hann tekur við af Göran Persson, leiðtoga Jafnaðarmannaflokksins, sem hefur gengt embættinu í áratug. Flokkur hans galt afhroð í kosningunum. Reinfeldt sagði þetta mikinn heiður sem fylgdi töluverð ábyrgð.

Það var svo í morgun sem Reinfeldt kynnti ríkisstjórn sína. Ráðherrar eru tuttugu og tveir, þar af tíu konur. Mesta athygli vekur að Carl Bildt, fyrrverandi leiðtogi Hægriflokksins og forsætisráðherra á árunum 1991 til 1994, verður utanríkisráðherra. Það kom nokkuð á óvart að Bildt yrði fyrir valinu þar sem hann sagði fyrir kosningarnar að erfitt yrði að hafa gamlan forsætisráðherra í nýrri ríkisstjórn. Bildt, sem er 57 ára, segir þetta áhugavert verkefni og telur að ný ríkisstjórn standi traustum fótum.

Lars Leijonborg, leiðtogi Þjóðarflokksins, verður menntamálaráðherra, Maud Olofsson, leiðtogi Miðjuflokksins, verður atvinnumálaráðherra, og Göran Häggelund, leiðtogi Kristilegra demókrata, verður félagsmálaráðherra.

Í ræðu sinni á þingi í morgun sagði Reinfeldt að borgaralegu flokkarnir hefðu fengið umboð frá kjósendum til að breyta Svíþjóð. Hann sagði að staðið yrði við gefin loforð um skattalækkanir og niðurskurð í velferðarkerfinu. Stefnt verði að því að skila tekjuafgangi í fjárlögum.