Fótbolti er skemmtilegur

Fyrirgefðu fröken, en værir þú nokkuð til að biðja flugstjórann að spyrja flugturninn hvernig leikurinn í dag fór, sagði ég sundarhátt á leiðinni heim frá Þýskalandi síðdegis. ,,Sjálfsagt'' og svo kom hún með fréttirnar: England 1, Paragúæ 0, og hver skoraði spurði ég: ,,Þeir sögðu það ekki, því miður.''

Þannig er England komið með þrjú stig, og kemur ekki á óvart, úrslit eftir bókinni og þeir skoruðu ekki einu sinni markið sjálfir. Svíar hljóta að sama skapi að vera svekktir eftir daginn, javla! Þeir reyndu og reyndu, en alls ekkert gerist, 1 stig, en Trinidat fær 12 stig einsog í Júróvison fyrir að hanga á þessu einum færri.

Það er svo geðveikt hreinlega að sjá Fílabeinstrendinga, líktog einhver kallaði þá í dag, samanber Skagstrendinga, baráttulið og héngu í sterkum Argentínumönnum. Ég hef ekki verið mikill aðdáandi Drogba, en mikið andskoti er maðurinn duglegur á vellinum, og allt liðið raunar, sterkir, leiknir og áræðnir í meira lagi, þeir eiga mikið hrós skilið fyrir að gera þriðja leikinn í kvöld að stórkostlegri skemmtun lengstum.

Þetta HM er strax orðið stórmót, ég sá ágætan mann rifja upp gríska harmleikinn á EM í blöðunum í dag, hvernig þeir gersamlega gerðu útum alla ánægju sem getur stafað af fóboltaleiknum, eyðileggingarfótbolti er gott orð, en um leið var þetta gagnleg taktík, heldur betur. En hvernig Svíinn Sven getur verið ánægður með leik sinna manna í dag, er óskiljanlegt, frábært að fá þrjú stig, en ég var guðslifandi feginn að þurfa ekki að horfa á nema upprifjun úr honum og lesa ensku pressuna, ef þetta lið fer langt á HM þá er gríska ævintýrið komið út aftur, annar hluti. Englendingar eru með frábæra miðju, sterka vörn en hitt er rubbish.

Ég spenntur fyrir Hollendingunum á morgun, þótt Van Basten sé algerlega óreyndur þjálfari þá er hann að gera það sama og Klinsmann, treysta ungum, áhugasömum leikmönnum fyrir partíinu, frekar en að leyfa gömlum hundum að eyðileggja stemninguna. Á morgun verður góður dagur, fótbolti er skemmtilegur.