Messi missir líklegast af opnunarleiknum

Argentínska ungstirnið Leo Messi mun að öllum líkindum missa af opnunarleik liðsins geg Fílabeinsströndinni sem fer fram 10. júní. Messi, sem spilaði ekkert með Barcelona síðustu tvo mánuði tímabilsins, meiddist á læri gegn Chelsea í byrjun mars. Hann spilaði sinn fyrsta leik eftir meiðslin í 4-0 sigri U-20 ára landsliðs Argentínu fyrr í þessari viku. Hann spilaði einungis í 15 mínútur í þeim leik og honum finnst hann vera töluvert frá fyrra formi.

"Í dag reikna ég ekki með að vera í liðinu," sagði Messi. "Ég hef ekki spilað mikið og hef verið frá í langan tíma. Ég spilaði í 15 mínútur um daginn og fann að ég var langt frá mínu besta. En ég er rólegur, ég veit hvað ég þarf að gera til að komast þangað. Mér líður betur með hverjum deginum sem líður. Ég mun komast í taktinn fyrir Heimsmeistarakeppnina. Mig langar að komast í úrslitaleikinn og mæta Brasilíu þar.