Slökkviliðið er enn að á Mýrum

Þegar talið var að tekist hefði að ná tökum á sinueldinum á Mýrum, tók hann sig upp á nýjan leik. Um eitt hundrað ferkílómetrar af móum og mýrum hafa orðið eldinum að bráð, í þessum langstærsta sinueldi í sögu Íslands. Tugir björgunarmanna voru sótsvartir og sveittir í allan gærdag og alla nótt að berjast við eldhafið á Mýrum en klukkan átta í morgun var talið að tekist hefði að ráða niðurlögum þess.

Það var svo rétt upp úr klukkan hálf fjögur í dag að boð barst um að eldurinn hefði tekið sig upp þegar hvessa tók af norðan. Við það nærðist eldglóð sem undir öskunni kraumaði og magnaðist upp svo kalla þurfti út slökkvilið frá Reykjavík, Akranesi, Borgarnesi og Borgarfirði á nýjan leik. Þá var hringt í bændur og þeir beðnir um aðstoð en haugsugur þeirra hafa gert mikið gagn í baráttunni við eldanna. Þyrla Þyrluþjónustunnar var kölluð út í annað sinn en þetta er í fyrsta skipti sem þyrla hefur verið notuð á þennan hátt á Íslandi.

Eldarnir á Mýrum eru þeir allra umfangsmestu í sögu Íslands. Vitað er um tvo aðra elda sem fram að þessu voru þeir mestu en þeir náðu ekki yfir nema um brot af því landssvæði sem Mýraeldar gera. Hátt á annað hundrað ferkílómetrar af votlendi og móum er nú sviðin jörð og ljóst að verulegar breytingar verða á gróðurfari á svæðinu sem fram til þessa hefur verið eitt mest samfellda votlendi landsins. Allt bendir til að mosi, fléttur, fjalldrapi og bláberjalyng muni sjást þar í minna mæli enda tekur það mörg ár, jafnvel áratugi fyrir þess háttar gróður að jafna sig eftir svo mikinn bruna. Þetta mun hafa gríðarleg áhrif á dýralíf á svæðinu en um 10 þúsund mófuglapör gera sér þar hreiður ár hvert.

Til að átta sig á hversu óhemjustórt landsvæði um ræðir þá skulum við bera svæðið saman við önnur þekkt kennileiti á Íslandi. Þá sést að svæðið er næstum tvöfalt höfuðborgarsvæðið sem er um 60 ferkílómetrar, fjórðungi stærra en Þingvallavatn sem er tæpir 84 ferkílómetrar og sjö sinnum stærra en Heimaey.

Björgunarmenn munu standa í ströngu fram eftir nóttu en að sögn veðurfræðings NFS á vindur eftir að snúa sér til norðurs á morgun sem gæti orðið til þess að eldarnir fari til suðurs þar sem mikið er um eldmat sem hefur fram að þessu sloppið.