Íbúum hefur ekki fjölgað jafn mikið í rúm fjörtíu ár

Á síðasta ári fjölgaði íbúum hér á landi meira en í rúm fjörtíu ár. Þar af fjölgaði íbúum hlutfallslega mest á Austurlandi og þar eru hvað mestu skekkjur í kynjahlutföllunum enda flestir nýbúar á Austurlandi karlmenn með erlent ríkisfang.

Þann 31. desember síðastliðinn voru íbúar á Íslandi 299.891 samkvæmt hagtíðindum Hagstofu Íslands. Það er 2,2% fleiri íbúar en árið 2004 þegar þá voru skráðir rúmlega 293 þúsund íbúar á Íslandi. Slík fjölgun hefur ekki sést hér á landi síðan seint á 6. áratugnum en þá starfaði fólksfjölgunin einkum af miklum fjölda fæðinga og bættum lífslíkum. Nú er öldin óneitanlega önnur og eru það nú einkum aðflutt vinnuafl sem orsakar þessa miklu fjölgun íbúa. Athygli vekur að íbúum fjölgaði á öllum landsvæðum nema á Vestfjörðum og Norðurlandi vestra. Íbúum heldur áfram að fjölga á höfuðborgarsvæðinu en fólksfjölgun hefur einnig aukist á öllum landsvæðum í nágrenni höfuðborgarsvæðisins, sérstaklega á Suðurnesjunum en þar fjölgaði íbúum um tæp 5% á árinu 2005. Líkt og nærri má geta er þó mesta hlutfallslega mesta fjölgun íbúa á Austurlandi eða um rúm 11%. Flestir nýbúanna á Austurlandi eru erlent vinnuafl og í raun hefur íslenskum ríkisborgurum fækkað á Austurlandi. Kynjahlutföll eru afar ójöfn á Austurlandi en þar eru 1367 karlmenn á móti hverjum 1000 konum.

Aldurssamsetning þjóðarinnar er einnig að breytast. Þegar mannfjöldapíramídar frá árinu 1960 og 2005 eru bornir saman sést glögglega að barneignir eru að dragast saman en árið 1960 voru árgangar undir 20 ára aldri mjög fjölmenni á móti því sem nú er, eða 12,5% árið 1960 á móti 7% núna. Að sama skapi eru Íslendingar alltaf að eldast og því fer fólki fjölgandi í elstu aldurshópunum. Íslenska þjóðin telst þó ung í samanburði við aðrar Evrópuþjóðir. Hlutfall aldraðra er enn nokkuð minna hér á landi en í flestum Evrópulöndum, þar sem barneignir hafa verið að dragast saman á síðustu áratugum. Það hefur þau áhrif að einstaklingar á vinnufærum aldri verða færri en samanlagður fjöldi þeirra sem teljast utan hans, það er börn og aldraðir.