Fádæma mikið álag á slökkviliði

Fádæma mikið hefur verið að gera hjá Slökkviliði höfuðborgarsvæðisins við sjúkraflutninga í dag. Frá klukkan hálfátta í morgun til klukkan tíu í kvöld fór slökkviliðið í 76 sjúkraflutninga en á meðaldegi eru flutningarnir á milli fjörutíu og fimmtíu talsins.

Mikið var um sjúkraflutninga vegna umferðarslysa, veikinda og flutninga milli sjúkrahúsa. Snemma í morgun mátti litlu muna að sjúkraflutningakerfi höfuðborgarsvæðisins springi.

Ekki var síður mikið að gera hjá Lögreglunni í Reykjavík, þar höfðu menn fengið tilkynningar um þrjátíu og sex árekstra frá klukkan átta í morgun en á meðaldegi eru um það bil fimmtán árekstrar tilkynntir til lögreglu og því má segja að um meira en tveggja daga skammt af árekstrum hafi verið að ræða.