Frjálst flæði vinnuafls dregur úr atvinnuleysi

Frjálst flæði vinnuafls úr tíu nýju löndum Evrópusambandsins virðist draga úr atvinnuleysi, þvert á það sem flestir bjuggust við. Eldri löndum sambandsins sem ekki hafa sett takmarkanir á flæði vinnuafls, farnast betur en öðrum.

Þetta eru niðurstöður nýrrar skýrslu frá framkvæmdastjórn Evrópusambandsins, sem greint er frá í nýjasta hefti the Economist. Þær benda afdráttarlaust til þess að höft á flæði vinnuafls skerði samkeppnishæfni þjóða.

Þegar hin tíu nýju ríki gengu í Evrópusambandið fyrir tæpum tveimur árum óttust margir að það myndi þýða algjört flóð fólks inn í ríkari lönd sambandsins, sem fyrirtæki gætu ráðið á miklu lakari kjörum en heimamenn. Þess vegna ákváðu tólf af fimmtán eldri löndum sambandsins að takmarka fjórfrelsið svokallaða og leyfa ekki óheftan flutning vinnuafls frá nýju ríkjunum tíu.

Aðeins Bretar, Írar og Svíar ákváðu að standa ekki í vegi fyrir frjálsu flæði fólks frá hinum nýju ríkjum. Samkvæmt skýrslunni nú hefur efnahagur þessara þriggja ríkja dafnað mun betur en gengur og gerist innan sambandsins auk þess sem dregið hefur úr atvinnuleysi.

Þó að auðvitað geti búið aðrar ástæður að baki en frjáls flæði vinnuafls bendir margt til þess að hið nýja vinnuafl stundi fyrst og fremst störf sem heimamenn sæki ekki í. Það leiði svo til meiri hagræðingar og hagnaðar, sem aftur fjölgi svo störfum.

Þrátt fyrir þetta er aðeins útlit fyrir að tvær þjóðir ætli að feta í fótspor Svía, Breta og Íra alveg í bráð, og það eru Finnland og Portúgal. Aðrar þjóðir innan samandsins ætla enn um sinn að bíða eftir frekari staðfestingu á áhrifum óhefts flæðis vinnuafls frá hinum tíu nýju ríkjum Evrópusambandsins.