Misvísandi spár um verðbólguþróun

Greiningardeildir bankanna eru klofnar í afstöðu sinni til þess hvort verðbólga hækki eða lækki á næstunni.

Greiningardeild Íslandsbanka spáir því að verðbólga hækki verulega milli mánaða og verði áfram yfir fjögurra prósenta efri vikmörkum Seðlabankans. Það yrði þá tuttugasta og þriðja mánuðinn í röð sem verðbólgan er yfir verðbólgumarkmiði Seðlabankans og sjöunda mánuðinn í röð sem hún er yfir efri vikmörkum bankans. Greiningardeild KB banka er á öndverðri skoðun og telur töluverðar líkur á að verðbólga lækki milli mánuða og fari jafnvel undir efri vikmörk Seðlabankans í fyrsta skipti í hálft ár.