Kynferðisbrotum gegn börnum fjölgaði

Kynferðisbrot gegn börnum voru 38 talsins árið 2005, en voru 19 árið áður, samkvæmt ársskýrslu lögreglustjórans í Reykjavík. Þá fjölgaði nauðganatilfellum um 72 prósent samkvæmt skýrslunni, voru 23 árið 2004 en 43 ári síðar.

Helgi Gunnlaugsson, prófessor í afbrotafræðum við Háskóla Íslands, varar við að tölurnar séu túlkaðar á þann hátt að kynferðisbrotum fari fjölgandi almennt í þjóðfélaginu. "Vegna þeirrar miklu og opnu umræðu sem hefur átt sér stað í þjóðfélaginu varðandi þessi brot hefur umburðarlyndisþröskuldurinn gagnvart þessu lækkað og því kærir fólk miklu frekar nú heldur en áður," segir Helgi. "Fórnarlömb þessara hroðaverka mæta líka mun meiri skilningi nú heldur en áður og fólk er meira á varðbergi gagnvart þessu."

Samkvæmt skýrslunni fjölgar minniháttar líkamsárásum rúmlega þrefalt, voru 38 árið 2004 en voru komnar upp í 123 árið á eftir. Hins vegar fækkar meiriháttar líkamsárásum um níu og hálft prósent. Helgi segir að þetta þurfi ekki endilega að þýða að minniháttar líkamsárásum hafi í raun fjölgað á strætum höfuðborgarinnar. "Núna er það orðið þannig að þegar menn verða fyrir hnjaski til að mynda á skemmtistað eða eitthvað slíkt, þá láta þeir ekki bjóða sér það og kæra hiklaust. Þessi umburðarlyndisþröskuldur gagnvart of­beldi er nánast að hverfa," segir Helgi.

Í ársskýrslunni kemur fram að innbrotum fækkar um rúm ellefu prósent á milli ára. Ingimundur Einarsson varalögreglustjóri í Reykjavík, þakkar þessa minnkun á milli ára auknu eftirliti lögreglu í hverfum borgarinnar, ásamt öflugu samstarfi við íbúana. "Næsta ársskýrsla mun sýna að innbrotum fer enn fækkandi. Lögreglan hefur markvisst tekið á þessum vanda," segir Ingimundur. "Við höfum einbeitt okkur að hverfum þar sem innbrot hafa verið tíðari en annars staðar og svo höfum við aukið eftirlit okkar með ákveðnum persónum sem við erum með á skrá hjá okkur."

Ingimundur segir marga ómerkta lögreglubíla á ferðinni í hverfum borgarinnar á kvöldin í eftirlitsferðum og afrakstur þessarar vinnu sé að skila sér með óyggjandi hætti í skýrslunni.