Si, claro

Það var í dag sem það gerðist, að Spánverjar sprengdu HM í loft upp. Þetta var engin venjuleg sólarlandaferð, þegar þeir tóku Úkraínu 4-0, alveg nýtt spánskt fótgöngulið, sem fór með Shevchenko og félaga einsog þeir væru í fjórða flokki.

Það var margt flott við þennan leik, Spánverjarnir nenntu ekki að hita sig upp fyrstu þrjátíu og fimm mínúturnar og koma sér þannig inní leikinn, það var bara byrjað strax og 2-0 eftir um þrjátíu mínútur var engin ofrausn, kannski svolítil heppni í marki númer tvö, en þetta var öruggt, fín vörn, frábærar staðsetningar og sendingarnar líktog pútt með golfkylfum. Síðari hálfleikur alveg klár, reyndar hæpinn brottrekstur kannski í þriðja markinu, Kristinn Jakopsson dómari dæmir í því máli í 442 í kvöld, og svo fjórða markið, ein stórsóknin til, og meira að segja Carlos Puyol lagði það upp, skalli á Fernando Torres sem settann niðri vinstra megin. Svo þegar reynsluliðinu var skipt inná, þá var ljóst að Spánverjar eru með ótrúlega sterkan hóp af fótboltmönnum, sem einsog konurnar sungu: Já, ég þori get og vil.

Það var í dag sem það gerðist að Spánverjar sýndu heiminum og öllum hinum liðunum á HM hvernig á að spila fótbolta, einfalt, fallegt og árangursríkt. Sólin er ekki lengur gul, heldur rauð.