Fimm ráðuneyti án kvenna

Forstöðumenn ríkisins á vegum ráðuneyta eru nú 222, að því er fram kemur í vefriti fjármálaráðuneytisins. Frá því í febrúar á síðasta ári hefur þeim fækkað um þrjá forstöðumenn. 77 prósent forstöðumanna eru karlar, eða 172, og 23 prósent eru konur, eða 50. Hlutfall kvenna í stöðu forstöðumanns hefur aukist um eitt prósentustig frá því í febrúar 2004, sem útskýrist af því að forstöðumennirnir þrír sem hafa hætt voru allir karlmenn. Í utanríkisráðuneyti, landbúnaðarráðuneyti, viðskiptaráðuneyti og umhverfisráðuneyti eru engar konur starfandi forstöðumenn, né heldur hjá Hagstofunni, en þar starfar einn forstöðumaður. Hæst er hlutfall kvenna í stöðu forstöðumanns hjá forsætisráðuneytinu, en þar eru þrjár af fimm forstöðumönnum konur. Næsthæst er hlufall kvenna í stöðu forstöðumanns hjá félagsmálaráðuneytinu, tæp 43 prósent. Sigríður Anna Þórðardóttir umhverfisráðherra segir að engin forstöðumaður hafi verið ráðinn í hennar tíð. "Það er ein ráðning sem ég hef staðið að, sem var endurráðning." Hún segir að mjög vel sé staðið að jafnréttismálum í ráðuneytinu. Tveir skrifstofustjórar af fjórum séu konur og þegar litið sé til nefndarstarfs séu um þrjátíu prósent nefndarmanna á vegum ráðuneytisins konur. "Ég held að megi segja að þegar málin eru skoðuð, hefur þetta ráðuneyti staðið framarlega. Þetta eru hins vegar mál sem þurfa alltaf að vera til skoðunar, við vitum það." Valgerður Sverrisdóttir viðskiptaráðherra segir að af fjórum forstöðumannsstöðum ráðuneytissins komi hún ekki að ráðningu þriggja, heldur sé það mál stjórnar stofnana. Hún segir að bæði orkugeirinn og fjármálageirinn séu ansi mikil karlaveldi. "Þetta atvinnulífstengda starf og stofnanir eru mjög karllægar. Ég er ekki sérstaklega stollt yfir þessari útkomu í mínum stofnunum, en við ráðningu hef ég lagt mikla áherslu á að fara faglega í hlutina og skoða allar umsóknir með jákvæðu hugarfari." Ekki náðist í Davíð Oddsson utanríkisráðherra og Guðna Ágústson landbúnaðarráðherra. Kynjaskipting í forstöðumannahóp ríkisins Ráðuneyti Karlar Konur Samtals Forsætisráðuneytið 2 3 5 Menntamálaráðuneytið 35 19 54 Utanríkisráðuneytið 4 - 4 Landbúnaðarráðuneytið 10 - 10 Sjávarútvegsráðuneytið 5 1 6 Dóms- og kirkjumálaráðuneytið 33 10 43 Félagsmálaráðuneytið 8 6 14 Heilbrigðis- og tryggingamálaráðuneytið 25 8 33 Fjármálaráðuneytið 20 1 21 Samgönguráðuneytið 8 1 9 Iðnaðarráðuneytið 7 1 8 Viðskiptaráðuneytið 4 - 4 Hagstofa Íslands 1 - 1 Umhverfisráðuneytið 10 - 10 Samtals 172 50 222 Kynjaskipting 77% 23% 100%