Óbreytt áætlun Iceland Express

Pálmi Haraldsson, einn aðaleiganda Iceland Express og Sterling, segir að ákvörðun Iceland Express um að fljúga til sex nýrra ákvörðunarstaða í Evrópu standi óbreytt þótt Sterling verði selt til FL Group. FL Group ætlar að taka upp viðræður við eignarhaldsfélagið Fons um kaup á Sterling-lágjaldaflugfélaginu, því fjórða stærsta í heimi. Ákvörðun um viðræður kemur í kjölfar þess að dönsk yfirvöld samþykktu kaup Sterling á Mærsk en félagið heitir Sterling eftir samrunann. Heimildarmenn fréttastofu töldu líklegt að ætlun eigenda Fons, þeirra Pálma Haraldssonar og Jóhannesar Kristinssonar, hafi verið frá upphafi að sameina Sterling, Mærsk og Iceland Express. Ætlunin hafi verið að búa til álitlegan pakka með tilheyrandi samlegðaráhrifum til að selja og græða fé. Pálmi neitar að staðið hafi til að sameina Sterling og Iceland Express og segist þá aðeins geta svarað fyrir sína hönd. Hann segir að samþykkt hafi verið að setjast niður með hugsanlegum kaupendum en engin tímasetning verið ákveðin. Það er einnig hægt að sjá fyrir sér að greitt yrði fyrir Sterling að stærstum hluta með hlutabréfum í FL Group en þá kæmi málið til kasta samkeppnisyfirvalda nema Iceland Express yrði selt. Birgir Jónsson, núverandi framkvæmdastjóri Iceland Express, lýsti því yfir í viðtali við Morgunblaðið fyrsta september að hann gerði ráð fyrir að fargjöld með Flugleiðum myndu lækka til muna þegar Iceland Express færi að fljúga til Gautaborgar, Stokkhólms og Bergen auk þriggja nýrra áfangastaða í Þýskalandi. Það hefði alla vega gerst með flugfargjöld til London og Kaupmannahafnar. Sterling hefur auk þess fyrirætlanir um að hefja Ameríkuflug og gæti reynst harðsnúinn keppinautur FL Group þar. Pálmi segir að áform Iceland Express um að fljúga til þessara áfangastaða í Evrópu standi óbreytt, hvort sem Sterling verður selt eða ekki. Þeir séu líka á fullu að klára saminga um vélaflota og stækka og efla Iceland Express áfram.