Kveikt í bíl ráðherrans

Kveikt var í bíl danska innflytjendaráðherrans Rikke Hvilshøj í Hróarskeldu í fyrrinótt. Bíllinn sjálfur er gjörónýtur auk þess sem bruninn olli nokkrum skemmdum á húsi ráðherrans. Ráðherran og fjölskylda hennar slapp þó án þess að verða fyrir meiðslum. Tilræðismennirnir sendu strax um morguninn fréttatilkynningu á flestar helstu fréttastofur Danmerkur þar sem þeir lýsa því yfir að nú hafi þeir fengið nóg af friðsamlegum baráttuaðferðum gegn "rasískri innflytjendapólitík" dönsku ríkisstjórnarinnar. Í tilkynningunni kemur líka fram að þeim þyki það mikill tvískinnungur að Anders Fogh Rassmussen forsætisráðherra bæði gyðinga afsökunnar á því að Danir hafi vísað flóttamönnum frá Þýskalandi nasismans frá í síðari heimsstyrjöldinni á sama tíma og hælisleitendum er æ sjaldnar hleypt inn í landið á grundvelli hertra innflytjendalaga og kalla Fogh hræsnara og tækifærissinna. Tölvan sem notuð var til að senda póstinn var gerð upptæk á netkaffihúsi í Nørrebro og leitar lögreglan leiða til að rekja hver sendi póstinn.