Allrahanda uppfylltu ekki skilyrði

Aðstoðarvegamálastjóri segir fyrirtækið Iceland Excursions Allrahanda ekki hafa uppfyllt skilmála útboðs um sérleyfisakstur á milli Reykjavíkur og Keflavíkurflugvallar. Það sé ástæða þess að samið var við fyrirtæki sem átti tilboð sem var tugum milljóna króna óhagstæðara en tilboð Allrahanda. Nýverið voru öll sérleyfi fyrir farþegaflutninga á Íslandi boðin upp. Mesti slagurinn stóð um sérleyfið á Suðurnesjum sem tekur til aksturs til flugvallarins, þá leið sem felur í sér mesta tekju- og hagnaðarvonina. Allrahanda bauðst til að borga 103 miljónir með sérleyfinu en Kynnisferðir, sem fengu sérleyfið, greiða 27 milljónir með því. Yfirmenn Allrahanda hafa kært niðurstöðuna til kærunefndar útboðsmála ogsaka yfirmenn Vegagerðarinnar um að sniðganga lög um opinber innkaup. Þeir segja þetta þýða að ríkið þurfi að greiða 76 milljónum meira fyrir aksturinn. Þótt Allrahanda hafi orðið af sérleyfinu segja forsvarsmenn fyrirtækisins það þó ekki vera mesta skaðann. Heiðar Hrafn Eiríksson, framkvæmdastjóri Allrahanda segir verst að helsti samkeppnisaðilinn fái verkefnið á meðan Allrahanda fái það á sig að þeir standist ekki kröfur til að sinna fólksflutningum. Það sé slæmt gagnvart kúnnum fyrirtækisins, sem séu margir þeir sömu og Kynnisferða. Hann segist engar skýringar hafa fengið frá Vegagerðinni á því hvaða skilmála eða skilyrði það séu sem fyrirtækið uppfylli ekki. Í samtali við fréttastofu í dag sagðist aðstoðarvegamálastjóri, Gunnar Gunnarsson ekki vilja ræða málið í fjölmiðlum. Ástæðurnar kæmu í ljós þegar málið kæmi fyrir kærunefnd útboðsmála.