Gríðarlegur niðurskurður?

Niðurskurðarhugmyndir Bandaríkjamanna á Keflavíkurflugvelli eru slíkar að umsvifin þar yrðu álíka lítil og fyrir rúmri hálfri öld. Nánar tiltekið er átt við árin 1946 til 51, þegar u.þ.b. 150 hermenn voru í stöðinni og um 300 Íslendingar, en um sjö hundruð Íslendingar eru þar nú eftir mikinn niðurskurð á síðustu misserum. Samkvæmt heimildum fréttastofu vilja Bandaríkjamenn halda við þá ákvörðun sína að flytja orrustuþoturnar fjórar héðan og sinna öryggishlutverki þeirra frá flugstöðinni í Laden Heath í Bretlandi. Jafnhliða yrði þyrlubjörgunarsveitin flutt héðan því hún er nátengd herþotunum. Þá vilja Bandaríkjamenn að Íslendingar greiði allt að 75 prósentum kostnaðar við rekstur flugbrautannna á Keflavíkurflugvelli, og álíka hlutfall í rekstri slökkviliðins þar, en Bandaríkjamenn greiða nú fyrir þessa þætti. Þá vilja þeir að flugherinn taki yfir rekstur stöðvarinnar af sjóhernum og reki hér viðhaldsstöð fyrir bandarískar og aðrar NATO-flugvélar, sem hér þyrftu að hafa viðkomu. Bandaríski herinn og hervélar NATO hefðu áfram full afnot af vellinum þegar á þyrfti að halda en án viðveru flugvéla hér. Heimildir fréttastofu herma að þetta séu ítrustu kröfur Bandaríkjamanna, sem auðvitað eigi svo eftir að semja um, en að á þessu stigi sé afar ólíklegt að herþotur verði hér áfram til frambúðar. Ekki fást upplýsingar um kröfur Bandaríkjamanna í utanríkisráðuneytinu hér en sem kunnugt er varð ekkert úr fyrirhuguðum viðræðum í Wasington í gær eftir að íslenska sendinefndin hafði farið yfir kröfur Bandaríkjamanna.