Frétt DV röng segir rektor

Rektor Viðskiptaháskólans á Bifröst segir forsíðufrétt DV í dag, að Sveinbjörn Kristjánsson, fangi á Litla Hrauni, stundi bókhaldsnám á Bifröst, vera ranga. Runólfur Ágústsson rektor segir Eirík Jónsson, blaðamann á DV, hafa haft samband við skrifstofu háskólans í gær og óskaði eftir upplýsingum um það hvort Sveinbjörn stundaði nám við skólann. Hann hafi fengið samband við Runólf sem svaraði því til að ekki væru gefnar slíkar upplýsingar um einstaka nemendur, enda vinnuregla að gefa ekki upplýsingar um námsframvindu, árangur eða aðrar persónulegar upplýsingar um nemendur eða umsækjendur um skólavist, án samráðs við þá. Skólinn hafði svo í morgun samband við Sveinbjörn og fékk heimild hans til að birta umræddar upplýsingar. „Sveinbjörn sótti um nám fyrir síðustu vorönn en gat þá ekki stundað það vegna aðstöðuleysis í fangelsinu.  Hann endurnýjaði umsókn sína fyrir haustmisseri sem nýlega er hafið.  Honum hefur verið tilkynnt að hann verði tekinn í nám samkvæmt umsókn að því gefnu að fangelsisyfirvöld tryggi honum og skólanum viðunandi aðstöðu til að hann geti sinnt sínu námi,“ segir í tilkynningu rektors. Sveinbjörn er iðnrekstrarfræðingur frá THÍ og vantar 30 einingar til að geta lokið námi í viðskiptafræði.  Þau fög sem hann þarf að taka til að geta lokið fjarnámi frá Bifröst eru eftirfarandi:  Aðferðafræði viðskipta, breytingastjórnun og stefnumótun, fjármál og fjármálamarkaðir, hagnýt hagfræði, málstofa um íslenskt atvinnulíf, markaðsmál og neytendahegðun, nýsköpun og frumkvöðlafræði, samningatækni, samtímamenning og viðskiptasiðfræði. Auk þess myndi hann samhliða skrifa BS ritgerð undir leiðsögn umsjónarkennara. Bókhald er ekki á meðal þeirra kennslugreina sem Sveinbjörn myndi leggja stund á, enda gert ráð fyrir að nemendur á 3. ári í viðskiptafræði hafi tileinkað sér slíkar grunngreinar fyrr í sínu námi, að sögn Runólfs. Runólfur kveðst hafa heimsótt Sveinbjörn á Litla Hraun þann 26. ágúst sl. til að kanna aðstæður hans til háskólanáms og ræddi um leið við Kristján Stefánsson fangelsisstjóra.  „Gerði ég fangelsisstjóranum grein fyrir því að í krefjandi háskólanámi, eins og því sem Sveinbjörn vildi stunda í fjarnámi, þyrfti hann að lágmarki netaðgang í 30 klst. á viku og að slíkt væri í raun forsenda þess að Bifröst treysti sér til að taka Sveinbjörn í nám.  Á fjarnámsvef skólans þyrfti hann að hlusta á fyrirlestra, vinna verkefni, hafa samskipti við samnemendur sína og kennara, auk þess að afla gagna úr alþjóðlegum gagnagrunnum til að geta stundað nám á Bifröst með fullnægjandi hætti.  Í framhaldi af þessum fundi var haft samband við forstjóra Fangelsismálastofnunar og atbeina hans óskað í málinu.  Ljóst er að öryggismál varðandi netnotkun fanga eru viðkvæmt atriði en háskólinn hefur bent fangelsisyfirvöldum á að þau megi leysa með einföldum hætti,“ segir Runólfur. Rektor segir ennfremur að Viðskiptaháskólinn á Bifröst telji sig hafa samfélagslegar skyldur. Hluti af þeim skyldum sé að stuðla að jöfnum rétti allra til náms við skólann. „Fangar eru þar ekki undanskildir, enda er það trú mín að bæði sé eðlilegt og sjálfsagt að skólakerfið, þ.m.t.  háskólar, sinni þörfum fanga til náms.“Í ljósi viðræðna við fangelsisyfirvöld og fréttar DV kveðst rektor hafa sent Birni Bjarnasyni dómsmálaráðherra bréf í dag og beðið hann að beita sér í málefnum Sveinbjörns og tryggja honum og öðrum föngum aðstöðu til háskólanáms. Viðskiptaháskólinn sé tilbúinn til samstarfs við fangelsisyfirvöld í þeim efnum.