Íbúum brátt leyft að snúa aftur

Yfirvöld í New Orleans munu leyfa fyrstu íbúunum að snúa til síns heima á mánudag, þremur vikum eftir yfirreið fellibylsins Katrínar þar um slóðir. Algjör eyðilegging blasir víða við og þá ganga hermenn um götur borgarinnar til þess að koma í veg fyrir rán og gripdeildir. Borgaryfirvöld munu á næstu tíu dögum hleypa um 200 þúsund manns inn í borgina. Þau vonast einnig til að eigendur verslana og veitingastaða geti snúið aftur og hafið rekstur á ný til þess að glæða borgina lífi en skortur á mat og hreinu vatni gæti komið í veg fyrir það. Búið er að dæla miklu af því vatni sem flæddi yfir borgina í kjölfar fellibylsins en þó eru 40 prósent hennar enn umflotin. Rúmlega 800 manns hafa fundist látnir eftir að fellibylurinn reið yfir.