Um 400 börn enn á biðlistum

Enn vantar um 185 starfsmenn á leikskóla og frístundaheimili í Reykjavík. Að sögn Gerðar G. Óskarsdóttur, sviðsstjóra Menntasviðs Reykjavíkurborgar, er enn verið að reyna að fylla um100 stöður í leikskólum borgarinnar. Soffía Pálsdóttir, æskulýðsfulltrúi hjá Íþrótta- og tómstundaráði sem rekur frístundaheimili grunnskólanna, segir að enn vanti um 85 starfsmenn á frístundaheimilin. Nokkuð vel gekk að ráða fólk í síðustu viku eins og vonast hafði verið eftir því háskólanemar hafa nú fengið afhentar stundarskrár sínar og geta þar af leiðandi ráðið sig til vinnu. Börnum á biðlistum frístundaheimilanna hefur að sama skapi fækkað í 416 úr 511 á einni viku. Að sögn Soffíu er ástandið á frístundaheimilunum verst í úthverfum. "Það er erfiðast í Breiðholti og Grafarholti og en fólk ber því við að of langt sé að ferðast þangað til vinnu þegar vinnutíminn er aðeins þrjár til fjórar stundir á dag," segir hún. "Mikið af starfsfólki frístundaheimilanna er háskólafólk sem vill vinna sem næst miðbænum." Að undanförnu hefur ÍTR hefur auglýst eftir eldra fólki í störf á frístundaheimilum. Að sögn Soffíu hefur aldurshópurinn 60 ára og eldri brugðist vel við og þó nokkuð af starfsfólki skilað sér úr þeim hópi. Vonast hún til að enn fleiri eldri borgarar sjái sér hag í því að starfa á þessum vettvangi. "Við getum ekki gefist upp og verðum að reyna að halda áfram að finna starfsfólk," segir Soffía. Starfsmannamál leikskólanna verða rædd í borgarráði og menntaráði í dag. Stefán Jón Hafstein borgarfulltrúi R-listans og formaður borgarráðs segir að ráðið muni ræða útfærslu á 50 milljóna króna aukafjárveitingu sem samþykkt var í síðustu viku og ætluð var til að hjálpa til við að leysa starfsmannavanda leikskóla og frístundaheimila. Hann segir stöðuna hafi batnað á síðustu dögum og biðlistar á frístundaheimili styst. "Það gengur samt ekki nógu hratt að mínu mati og þykir mér það óskaplega leitt fyrir hönd þeirra sem vilja veita góða þjónustu," segir Stefán Jón