Tilboð Skipta í Símann samþykkt

Öll gögn Skipta ehf, hæstbjóðanda í hlut ríkissjóðs í Símanum reyndust fullnægjandi. Formaður einkavæðingarnefndar tilkynnti fyrir stundu að Geir H. Haarde, fjármálaráðherra hefði, í samráði við ráðherranefnd um einkavæðingu, samþykkt tillögu nefndarinnar um að taka tilboði Skipta í Símann en tilboðið hljóðaði upp á 66,7 milljarða króna. Reiknað er með að skrifað verði undir samninga vegna kaupanna í næstu viku. Samkvæmt útboðsreglum var áskilið að ef tilboð væru innan við 5% lægri en það hæsta gæfist þeim sem væru innan marka kostur á að hækka tilboð sín. Til þess kom þó ekki. Alls bárust þrjú tilboð og reyndust öll gögn fullnægjandi. Tilboð Skipta var yfir fyrrgreindum 5% mörkum. Að hópnum standa Exista, sem er fjárfestingarfélag í meirihlutaeigu Bakkabræðra Holding, Lífeyrissjóður verslunarmanna, Gildi-lífeyrissjóður, Sameinaði lífeyrissjóðurinn, Samvinnulífeyrissjóðurinn, MP fjárfestingarbanki hf., Kaupþing banka hf. og IMIS ehf., sem er í eigu Skúla Þorvaldssonar. Næsthæsta tilboð átti Símstöðin, 60 milljarða króna. Í þeim hópi eru meðal annars Burðarás, KEA, Ólafur Jóhann Ólafsson, Tryggingamiðstöðin, Talsímafélagið og fleiri. Munurinn á því og hæsta tilboði er ríflega 10%. Þriðja og lægsta tilboð átti Nýja símafélagið, 54.645.780.000 og munar rúmum 18% á því og hæsta tilboði. Í tilkynningu frá KB banka segir að kaup Skipta á Símanum muni tryggja aðkomu stórs hluta landsmanna í gegnum eign þeirra í lífeyrissjóðunum. Þá segir að traustir langtímafjárfestar komi að kaupunum. Kaupsamningur á milli hópsins og ríkisins verður undirritaður á næstu dögum með fyrirvara um samþykki Samkeppniseftirlitsins. Fjármögnun kaupana hefur verið að fullu tryggð. Hlutafé skiptist með eftirfarandi hætti á milli aðila:  Exista ehf. 45% Kaupþing Banki hf. 30% Lífeyrissjóður verslunarmanna 8,25% Gildi-lífeyrissjóður 8,25% Sameinaði lífeyrissjóðurinn 2,25% Samvinnulífeyrissjóðurinn 2,25% MP fjárfestingarbanki 2% IMIS ehf. 2%  Þá segir í tilkynningunni að þátttaka lífeyrissjóða tryggi aðkomu stórs hluta landsmanna að kaupunum auk þess sem fyrirhugað sé að skrá félagið á Aðallista Kauphallar Íslands í síðasta lagi fyrir árslok 2007. Samfara skráningunni verður hlutur Kaupþings banka boðinn almenningi og fagfjárfestum til kaups. Með kaupum fjárfestahópsins á Símanum verður það jafnframt tryggt að Síminn eigi áfram öflugan bakhjarl sem standa mun vörð um fyrirtækið. Í tilkynningu KB banka segir að kaupendur Símans beri fyllsta traust til stjórnenda og starfsmanna Símans. Þeim sé það ljóst að starfsmenn Símans eru undirstaða góðs rekstrarárangurs síðustu ára. Markmið nýrra eigenda er að tryggja áfram framúrskarandi þjónustu við viðskiptavini og enn frekari sókn Símans á fjarskiptamarkaði. Heildareignir kjölfestufjárfestisins, Exista, nema um 90 milljörðum króna og er félagið stærsti hluthafinn í Kaupþingi banka, Bakkavör Group og Flögu Group.