Íslenskir jeppar í friðargæslu

Íslenskir fjallajeppar verða notaðir við friðargæslu í Afganistan. Bandaríkjamenn vilja að íslenskir friðargæsluliðar og kollegar þeirra taki við störfum í Suður-Afganistan þar sem talíbanar eru skæðir og drepi menn, þurfi þess. Íslensku friðargæsluliðarnir eiga að ferðast um norður- og vesturhluta Afganistans í bílunum frá september nk. Starf þeirra á að felast í því að kanna aðstæður í þorpum og bæjum og gera tillögur að úrbótum í samstarfi við alþjóðastofnanir og hjálparsamtök. Þetta eru ósköp venjulegir fjallajeppar, ekki ólíkir þeim sem íslenskar björgunarsveitir nota við störf sín. Einhverjum kynni að þykja það bera vott um barnaskap að telja fjallajeppa nægja við störf í Afganistan þar sem talíbanar láta til sín taka í sífellt meiri mæli og mannfall hefur verið töluvert undanfarið. En íslensku sveitirnar verða að störfum í norðvesturhluta landsins þar sem einnig eru norskar, finnskar, litháískar, lettneskar og danskar sveitir að störfum. Ástandið þar er sagt stöðugt og hættan talin lítil, enda er höfuðvígi talíbana einkum í suðri, nærri landamærunum að Pakistan. Engu að síður þykir rétt að léttbrynverja bílana og segir Arnór Sigurjónsson hjá íslensku friðargæslunni að kevlar-plötur verði settar í hurðir og gólf bílanna. Það er svipað og gert var við bíla sem friðargæsluliðarnir í Kabúl voru á. Bandaríkjamenn þrýsta á að ISAF-sveitirnar, alþjóðlega friðargæsluliðið, taki við starfi bandarískra sveita í suðurhluta Afganistans þar sem hættan er margfalt meiri en annars staðar. NATO hefur ekki tekið vel í það og deilt er hart um hvort að það skref sé skynsamlegt, ekki síst með hliðsjón af því að Bandaríkjamenn vilja að sveitirnar í suðrinu sýni meiri hörku - elti til dæmis upp grunsamlega og hættulega menn og drepi ef þurfa þykir. ISAF-sveitunum er aftur á móti sagt að snúa við og aka greitt í hina áttina, sé eitthvað dularfullt á kreiki. Engar líkur eru á að niðurstaða fáist í viðræður um þessa verkaskiptingu á næstunni og því ólíklegt að íslensku friðargæsluliðarnir lendi í fanginu á talíbönum að öllu óbreyttu.