Enginn gengst við könnun

Leiðtogaefni Sjálfstæðisflokksins í Reykjavík segjast grunlaus um hver standi að könnun Gallups á fylgi frambjóðenda flokksins í Reykjavík. Í könnun Gallups hljóðar spurngingin svo: "Hver eftirtalinna ætti að leiða lista Sjálfstæðisflokksins í Reykjavík? Og valmöguleikarnir eru eftifarandi: 1) Gísli Martein Baldursson 2) Guðlaugur Þór Þórðarson 3) Hanna Birna Kristjánsdóttir 4) Júlíus Vífill Ingvarsson 5) Vilhjálmur Vilhjálmssson Enginn borgarfulltrúanna fimm segist þó standa að könnuninni eða vita hver hafi greitt fyrir hana. Vilhjálmur sagðist í samtali við Fréttastofu vita af könnuninni og sagðist þekkja fólk sem hefði svarað henni. Hins vegar væri hún hvorki á sínum vegum né stuðningsmanna sinna. Þá væri það líka alveg á hreinu að hvorki Valhöll né borgarstjórnarflokkur Sjálfsæðismanna stæðu að könnuninni.  Guðlaugur Þór Þórðarson hafði sömu sögu að segja og Vilhjálmur og fullyrti að hún væri ekki undan sínum rifjum runnin. Hvorki Gísli Marteinn né Hanna Birna vissu neitt meira um tildrög könnunarinnar en Vilhjálmur og Guðlaugur. Hvorugt vildi þó útiloka að sitt fólk stæði að henni en ef svo væri, hefðu þau ekki verið látin vita af því. Júlíus Vífill kom af fjöllum þegar málið var borið undir hann og aftók með öllu að hann ætti nokkurn hlut að máli. Hann var hins vegar mjög ánægður með að nafn hans væri á listanum, þó að hann hefði ekki einu sinni gefið það út að ætla í framboð yfirleitt. Þrátt fyrir fjölmargar hringingar og ítarlegar tilraunir tókst fréttastofu ekki að komast til botns í þessu dularfulla máli í dag. Huldumaðurinn eða mennirnir sem að könnuninni standa þurfa að borgar tæpar sjötíu þúsund krónum fyrir. Afrakstur gjaldsins liggur samt ekki fyrir alveg í bráð, því framkvæmd könnunarinnar er ekki lokið.