Mikill hraði og spenna

"Starf mitt hjá Íslandsbanka snýr að verðbréfaþjónustu og eigin viðskiptum bankans með verðbréf, en þetta eru sviðin sem við köllum markaðsviðskipti, eignastýringu, fyrirtækjaráðgjöf og eigin viðskipti og þar á sér stað allt milli himins og jarðar," segir Helga Hlín og bætir við að heilmikið regluverk gildir um þessi viðskipti sem þarf að passa upp á að farið sé eftir. "Ég er líka regluvörður en hann hefur eftirlit með viðskiptum starfsmanna með verðbréf, eigin viðskiptum bankans með verðbréf og svokölluðum kínamúr innan bankans. En það gengur út að á gæta trúnaðar á milli einstaka sviða innan bankans og sjá til þess að trúnaðarupplýsingar fari ekki á milli deilda sem gætu valdið hagsmunaárekstrum," segir Helga Hlín. "Það er rosalega mikill hraði og spenna í þessu starfi og endalausar nýjungar sem eru mjög krefjandi. Ég á í miklum samskiptum við fólk, við viðskiptalífið og umhverfi þess í sinni víðustu mynd," segir Helga Hlín sem augljóslega hefur nóg á sinni könnu. Hún segist þó ekki vinna myrkrana á milli heldur skipuleggja sig vel og auk þess hafi hún góða samstarfsmenn. "Það koma auðvitað miklir álagspunktar,en þeir eru það hóflegir að maður sækir maður sér bara vítamínsprautu í rassinn til að fást við það. Það er líka nauðsynlegt að vera undir smá álagi stöku sinnum," segir Helga Hlín og brosir. Hún segir einnig að átak hafi verið í bankanum til þess að draga úr vinnuálagi og hafi það sannarlega skilað sér. "Grundvallarbreyting er á ásýnd vinnutíma hjá fólki sem skilar sér í ánægðari og skilvirkari starfsmönnum," segir Helga Hlín.