Var slysið í Aþenu sviðsett?

Gríska frjálsíþróttasambandið hefur frestað úrskurði dóms yfir tveimur bestu hlaupurum landsins sem eiga yfir höfði sér langt keppnisbann fyrir að skrópa í þremur lyfjaprófum í fyrra. Frægt var á ólympíuleikunum í Aþenu í fyrrasumar þegar fréttir breiddust út þess efnis að Costas Kenteris og Katerina Thanou hefðu lent í mótórhjólaslysi sem þau eru nú sökuð um að hafa sviðsett. Ástæða frestunar dómsins er sú að enn hafa ekki borist öll sönnunargögn verjanda þeirra en þau áttu að heyra dóminn í síðasta lagi í dag. Hlaupararnir fá því úr þessu að heyra örlög sín um miðjan mars. Umrætt atvik átti sér stað sama dag og þau áttu að mæta í lyfjapróf á meðan leikarnir stóðu yfir en þau lágu á spítala í 4 daga í kjölfarið. Þau eru þar fyrir utan grunuð um að hafa skrópað af ráðnum hug í tveimur öðrum lyfjaprófum á sömu tveimur mánuðunum í fyrra og eiga hugsanlega yfir höfði sér 2 ára keppnisbann sem gæti bundið enda á feril þeirra beggja. Verjandi hlauparanna segist vongóður um að gögnin sem beðið er eftir að hann leggji fram verði til þess að umbjóðendur sínir verði sýknaðir af umræddum ásökunum.