Íslendingur særist illa í Írak

Cesar Arnar Sanchez, liðlega tvítugur íslenskur hermaður í Írak, særðist alvarlega í flugskeytaárás í Írak síðustu nótt. Hann hefur verið mánuð í Írak og er þetta önnur sprengjan sem hann verður fyrir á fjórum dögum. Cesar Arnar verður 21 árs í næsta mánuði og er landgönguliði í bandaríska sjóhernum með undirforingjatign. Hann er fæddur á Íslandi en bjó í fimm ár í Bandaríkjunum en fluttist síðan til Íslands. Hann hefur verið eitt ár í hernum og var sendur til Íraks fyrir mánuði.  Í morgun fékk móðir hans, Arna Bára Arnarsdóttir símtal frá honum. Hún segir að flugskeyti hafi lent skammt frá honum og hann hafi fengið sprengjubrot á alla vinstri hliðina. Hann sé með 2. flokks áverka og alvarlega særður og allar líkur séu á að hann muni missa sjón á öðru auga. Herinn skiptir áverkum í þrennt: 1. flokkur er minniháttar meiðsl, 2. flokkur alvarleg meiðsl, eins og Cesar Arnar hlaut, og 3. flokkur er þegar bani hlýst af. Arna segir að Cesari hafi liðið mjög illa og hann hafi verið ringlaður. Cesar Arnar verður væntanlega fluttur á hersjúkrahús í Þýskalandi og þaðan til Maryland í Bandaríkjunum þangað sem alvarlega særðir hermenn eru sendir. En þetta er ekki fyrsta sprengjuárásin sem hann lendir í. Arna segir að á laugardaginn hafi hann líka lent í sprengju og þeyst nokkra metra aftur á bak á vegg. Hann hafi sloppið vel, aðeins marist en það hafi aðeins verið stoltið sem hafi særst. Arna ætlar að reyna að hitta son sinn sem fyrst. Hún segist ætla að gera allt sem hún geti til þess að komast til Maryland um leið og hann komi þangað, Cesar vilji fá hana. En hvernig líður íslenskri móður þegar sonur hennar er á átakasvæði í Írak? Arna segir sér ekki líða vel enda sé það ekki draumur fyrir foreldra að eiga börn í stríði. Aðspurð hvort hún hafi verið í sambandi við Cesar segir Arna að hún hafi heyrt í honum annan hvern dag í gegnum MSN-spjallforritið.