Tímamótaávarp frá Rice

Allir viðmælendur Condoleezzu Rice, utanríkisráðherra Bandaríkjanna, á Ítalíu veiktust og afboðuðu fundi sína með henni í morgun. Búist er við tímamótaávarpi frá henni í París síðdegis. Rice er í Róm og ætlaði þar að hitta Silvio Berlusconi forsætisráðherra og Jóhannes Pál páfa II að máli. Nú ber svo við að páfi er á sjúkrahúsi og því ekki fundafær og í morgun var greint frá því að Berlusconi væri lagstur í rúmið með flensu. Rice fundaði því með æðsta embættismanni Páfagarðs, Angelo Sodano, í morgun og hitti Gianfranco Fini, utanríkisráðherra Ítalíu, stuttlega að máli. Hún flýgur síðdegis til Parísar. Ræðu hennar þar er beðið með nokkuri eftirvæntingu því að þar er búist við því að heyra megi þann tón sem stjórn Bush Bandaríkjaforseta hyggst láta kveða við í samskiptum við Evrópuríki, einkum það sem Rumsfeld varnarmálaráðherra kallaði „gömlu Evrópu“. Ferð Rice er einnig frumsýning og er til þess ætluð að undirstrika þann mun sem er á henni og forveranum, Colin Powell. Ekki er nóg með að Rice njóti trausts forsetans, sé vinur hans og náinn ráðgjafi, ólíkt Powell. Hún ætlar sér líka að ferðast meira en hann en Powell er meðal þeirra bandarísku utanríkisráðgjafa sem minnst ferðuðust á meðan hann var í embætti. Reyndar er hermt að Rice sé svo mikið í mun að sýna og sanna hvað í hana er spunnið að þegar sama dag og tilkynnt var um tilnefningu hennar í nóvember á síðasta ári hafi verið lögð fram drög að aðgerðaáætlun fyrir fyrsta hálfa árið eða svo, þar á meðal miklar ferðaáætlanir sem hún er sjálf sögð eiga meginheiðurinn að. Hluti þessara áætlana gæti fallið vel í kramið í „gömlu Evrópu“: hún hyggst koma við í menningarstofnunum nánast alls staðar en sjálf er hún fær píanóleikari. Og skipulagningin nær ekki einungis til slíkra áætlana; hvert orð sem hún segir er sagt vera úthugsað. Til að mynda vakti athygli þegar hún sagði að engar áætlanir væru um að ráðast inn í Íran - en bætti við: „Að svo stöddu.“