Sigur Bræðralags múslima

Bræðralag múslima sexfaldaði þingsætafjölda sinn í egypsku þingkosningunum sem staðið hafa yfir undanfarnar vikur og kostað hafa tíu mannslíf. Á miðvikudaginn var endahnúturinn bundinn á egypsku kosningarnar þegar kosið var um þau þingsæti sem enginn frambjóðandi hafði fengið meirihluta til að skipa.

Að sögn egypskra embættismanna eru endanleg úrslit kosninganna á þá leið að Þjóðarflokkur Hosnis Mubarak forseta fékk 73 prósent atkvæða, frambjóðendur Bræðralags músl­ima 19 prósent en aðrir minna. Þingsætafjöldi Bræðralagsins hefur því sexfaldast, þeir höfðu áður 15 sæti en nú eru þeir með 88.

Átök og ofbeldi settu hins vegar svo mikinn svip á kosningarnar að AP-fréttastofan segir óháða eftirlitsmenn líta svo á að vart sé mark takandi á úrslitunum. Svo virðist sem stjórnvöld hafi skipað lögreglu að loka kjörstöðum á þeim slóðum þar sem Bræðralagið átti hvað mestu fylgi að fagna og handtaka nærfellt þúsund manns.

Til átaka kom á fjölmörgum stöðum vegna þessa og féllu tíu kjósendur fyrir hendi lögreglu. Bræðralagið hefur verið bannað af stjórnvöldum um áratuga skeið en vegna þrýstings frá Vesturlöndum hefur Mubarak veitt því meira frelsi og hafa liðsmenn þess fengið að bjóða sig fram sem óháðir frambjóðendur. Bræðralagið kveðst berjast fyrir löggjöf byggðri á íslam en samt segjast formælendur hennar tala fyrir mun hófsamari trúaráherslum en til dæmis þeim sem sádiarabísk stjórnvöld hafa innleitt. Bandaríkjastjórn hefur hingað til verið treg til samskipta við Bræðralagið, bæði vegna þess að Mubarak er því svo andsnúinn og vegna hermdarverka sem liðsmenn þess eru taldir hafa staðið fyrir í gegnum tíðina.

Al-Jazeera sjónvarpsstöðin hefur hins vegar eftir einum af formælendum bandaríska utanríkisráðuneytisins að í ljósi úrslitanna komi til greina að endurskoða þá stefnu, hugsanlega verði komið á samskiptum við einstaklinga innan samtakanna þótt formleg tengsl við Bræðralagið verði ekki tekin upp. Málið þykir sýna þá klemmu sem bandarísk stjórnvöld standa andspænis þegar kemur að því að eiga við hópa, eins og Hamas og Hizbollah, sem staðið hafa fyrir hryðjuverkum en vegnar jafnframt vel á stjórnmálasviðinu og njóta lýðhylli.