Al-Jaafari verður forsætisráðherra

Ný ríkisstjórn í Írak er að taka á sig mynd og virðist sem helstu byrjunarörðugleikunum hafi loks verið hrundið úr vegi. Nýr forsætisráðherra, sjítinn Ibrahim al-Jaafari, var tilnefndur í dag og mun innan tveggja vikna skipa ráðherra með sér í ríkisstjórn. Eitt meginverkefni ríkisstjórnarinnar verður að skrifa stjórnarskrá sem lögð verður fyrir í þjóðaratkvæðagreiðslu í haust. Þá sór Kúrdinn Jalal Talabani embættiseið í dag sem forseti. Þetta er í raun þriðja bráðabirgðastjórnin í Írak frá því Bandaríkin réðust þar inn fyrir tveimur árum. Þingkosningar eru aftur fyrirhugaðar fyrir árslok og þá fyrst mun ríkisstjórn sem er ekki bara til bráðabirgða líta dagsins ljós.